𝗩𝗲𝗻𝗶𝗹𝗮𝗹𝗲, 28 𝗦𝗲𝘁𝗲𝗺𝗯𝗿𝘂 2025 – Instituto Nacional de Farmácia e Produtos Médicos (FPM) hala’o selebrasaun aniversáriu ba Mahein FPM (naran antes SAMES) ba dala 15 iha Posto Administrativu Venilale hamutuk ho funsionariu sira iha Posto Adminsitrativu Venilale hahu husi loron 26 – 28 Setembru 2025.

FPM nudar instituisaun Publika nebe ho nia papel atu halo akizasaun ba produtu medikamentus sira, armazena no mos distribui ba fasilitade sira hotu iha Timor laran tomak. Alem de halo servisu ba publika maibe nafatin fó valor espiritual no solidariedade humanizmu liu husi selebrasaun Aniversáriu São Miguel Arcanjo ba dala 15, ho tema jerál “𝗛𝗼 𝗦ã𝗼 𝗠𝗶𝗴𝘂𝗲𝗹 𝗔𝗿𝗰𝗮𝗻𝗷𝗼 𝗔𝗺𝗶 𝗦𝗮𝗶 𝗙𝗼𝗿𝘁𝗲 𝗔𝘁𝘂 𝗦𝗲𝗿𝘃𝗶 𝗵𝗼 𝗙𝗶𝗱𝗲𝗹𝗶𝗱𝗮𝗱𝗲.”

Selebrasaun tinan ne’e la’ós de’it momentu atu halibur Servisu nain sira iha FPM, maibé oportunidade ida bo’ot atu hadia Espiritu servisu, hametin unidade no fó inspirasaun foun ba kbi’it servisu publiku.c

Atividade sira ne’ebé realiza inklui momentu sosial, espiritual no solidariedade, hanesan:

1. 𝗝𝗼𝗴𝘂 𝗔𝗺𝗶𝘇𝗮𝗱𝗲 𝗗𝗲𝘀𝗽𝗼𝗿𝘁𝗶𝘃𝘂 – Ekipa FPM no ekipa husi Venilale halibur iha jogo desportivu ho modalidade Volibol (Mane no Feto) atu nune’e lori alegria, hametin amizade no reforsa Relasaun fraternidade entre instituisaun rua refere.

2. 𝗥𝗲𝗳𝗹𝗲𝗸𝘀𝗮𝘂𝗻 𝗘𝘀𝗽𝗶𝗿𝗶𝘁𝘂á𝗹 (𝗧𝗮𝗶𝘇é) – refleksaun refere fo husi Madre Filhas de Maria Auxiliadora (FMA) sira iha Venilale nebe fasilita iha momentu sira meditasaun, ne’ebé lori partisipante sira atu halo refleksaun iha ambiente no fatin nebe silêncio, hamutuk ho muzika no orasaun.

3. 𝗣𝗲𝗿𝗲𝗴𝗿𝗶𝗻𝗮𝘀𝗮𝘂𝗻 𝗯𝗮 𝗙𝗼𝗵𝗼 𝗔𝗿𝗶𝗮𝗻𝗮 – Partisipante sira mos realiza peregrinasaun hodi vizita ba nain Feto Maria Auxiliadora Ariana, atu fó agradese no hametin devosuan ba Nain Feto, hatudu konfiansa ho esperansa ba Virjem María hanesan inan protetór. (Peregrinasaun ho Esperansa)

4. 𝗠𝗶𝘀𝘀𝗮 𝗔𝗴𝗿𝗮𝗱𝗲𝘀𝗶𝗺𝗲𝗻𝘁𝘂 – Iha Parókia Sagrado Coração de Jesus Venilale, halo missa agradesimentu ida, prezide husi Amo Pároku Pe. Carlos, atu fó agradesementu ba Aman Maromak liu husi Mehin São Miguel Arcanjo ne’ebé nafatin akompanhia FPM iha missáun institusaun. Iha Seberasaun Misa Agradesimentu refere responsavel no anima husi Koru São Rafael FPM.

5. 𝗔𝘀𝗮𝘂𝗻 𝗞𝗮𝗿𝗶𝗱𝗮𝗱𝗲 – Iha espírito solidariedade, FPM hala’o asaun karitativa hodi fó apoiu ba Orfanatu São Domingos Sávio Venilale, atu fahe ksolok no domin hamutuk ho ki’ik oan sira. Prezensa hamutuk ho sira nudar grasa Maromak nian no domin nebe ita bele fahe hamutuk ho sira.

Aktividade sira ne’e hotu lidera direta husi Exelentissimo Sr. Administrador Postu Venilale no mos Sr. Diretor Ezekutivu Interinu FPM hamutuk ho Dirijentes sira no Komisaun Organizador sira.

Ho loron aniversariu mehein São Miguel Arcanjo nian ida nee mak sinal ida klaru kona-ba objetivu institusaun: servisu publiku ho fidelidade, solidariedade no kbiit. “São Miguel Arcanjo hatudu dalan ba ita hotu atu la’o ho kbiit espiritual, la’o ho korajen no servisu ho laran mós ba povu. Tema nee ‘Ho São Miguel Arcanjo Ami Sai Forte Atu Servi ho Fidelidade’ sei fo inspirasaun atu ita hotu servisu ho dedikasaun no integridade,”

Selebrasaun nee loke perspektiva foun ba instituisaun no servisu nain FPM nian atu kontinua hametin espiritu kolektivu no motivasaun iha futuru, hodi bele kontinua atende komunidade ho servisu maka’as liu tan, hanesan São Miguel Arcanjo – protetór, defensor no inspirador ba justisa.

Aktividade sira ne’e lao ho susesu tanba hetan kolabora massimu husi Exelentissimo Sr. Administrador Posto Administrativu Venilale ho nia estrutura tomak hamutuk ho funsionariu sira husi diresaun oi-oin iha venilale no mos Dirjentes sira inklui funsionariu sira husi FPM.

News Page

News