RAEOA, 20/02/2025 – Instituto Nacional de Farmácia e Produtos Médicos – FPM assina renovasaun akordu tékniku ho Autoridade Rejiaun Administrativa Espesial Oe-Cusse Ambeno (RAEOA).

Serimónia Renovasaun akordu tekniku ne’e assina husi S.E. Prezidente Autoridade Rejiaun Administrativa Espesiál Oe-Cusse Ambeno (RAEOA) Sr. Rogério Tiago de Fatima Lobato no Sr. Diretor Ezekutivu FPM dr. Brígido Simão Dias de Deus, SpS. nebe hala’o iha salaun Gabinete Prezidente Autoridade RAEOA iha loron Kinta-Feira 20 Fevereiru 2025.

Normalmente akordu tékniku nebe mak FPM selebra ho Autoridade RAEOA ho durasaun tinan 1 (ida), tan ne’e presizamente halo renovasaun kada tinan.

Ho Renovasaun akordu refere mak sai nudar baze legal ba parte FPM no Autoridade hodi bele servisu hamutuk iha area fornesimentu produtos farmaceuticos ba iha Servisu Saúde Rejional Oe-Cusse no mos Hospital Referal Oe-Cusse Ambeno.

Objektivu renova akordu tékniku refere mak atu bele garante ba disponivilidade produtos farmaceuticos iha Hospital Referal Oe-Cusse Ambeno no inklui fasilidade saúde sira nebe iha RAEOA.

Iha Ambitu Serimónia renovasaun akordu tékniku ne’e, Diretor Ezekutivu FPM aprezenta ba S.E. Prezidente Autoridade kona ba objetivu no importansia ba renova akordu tekniku refere.

Tuir Diretor Ezekutivu FPM katak: atu bele hafasil servisu administrativamente, finansiamentu no mos servisu teknikamente sira seluk bele la’o ho diak presizamente iha baze legal hodi bele fo dalan ba FPM hodi hala’o servisu hahu prosesu aprovisionamentu to’o ba iha fornesimentu produtos medicos ba RAEOA.

Maske durante ne’e akordu laduak halo renovasaun, maibe FPM sempre disponivel hodi bele fornese nafatin produtu aimoruk no oxijenio sira mai iha RAEOA hodi bele halo antedementu ba passiente sira iha Hospotal Referal no fasilidade Saúde sira, bazeia ba pedidu sira nebe husi parte RAEOA hato’o ba iha FPM. Tan ne’e renovsasaun akordu tekniku refere atu bele fortifika liu tan ba servisu hirak nebe mak durante ne’e lao hela.

Iha tempu hanesan S.E. Prezidente Autoridade Rejiaun Administrativa Espesiál Oe-Cusse Ambeno (RAEOA) Sr. Rogério Tiago de Fatima Lobato hateten: “Senti kontenti tanba durante tempu naruk ita sempre koopera malu ho diak, maske administrasaun daudaun ne’e foun ho autoridade foun maibe servisu administrasaun publika nafatin la’o”.

S.E. Prezidente Autoridade mos hato’o agradese ba FPM tanba to’o agora nafatin fo assistensia hodi atende no fornese aimoruk ba iha RAEOA maske akordu refere remata ona iha 31 fulan Dezembru tinan 2024.

Nia Hatutan tan katak “Iha RAEOA iha moras oi-oin nebe eziste, no hau senti katak imi [FPM] nia kontribuisaun ba ami durante tinan hirak ne’e, kontribuisaun ida bo’ot tebes ho imi nia servisu, ita hotu-hotu servisu ba estadu Timor-Leste, imi servisu iha Dili, no ami servisu iha Rai-Ketan Oe-cusse, maibe ita hotu servisu ba ita nia rain”.

Partisipa iha serimónia renovasaun akordu tékniku refere mak Sercretário Rejional Saúde RAEOA Sr. Luis de Jesus Neno, Diretor Ezekutivu Hospital Referal Oe-cusse, Diretores sira husi Servisu Saúde Rejional Oe-cusse, Diretor APFRH FPM Kargu Xefia no funsionáriu sira husi FPM no Servisu Saúde Rejional Oe-cusse.