𝗦𝗲𝘀𝘁𝗮-𝗙𝗲𝗶𝗿𝗮, 30 𝗠𝗮𝗶𝘂 2025. Instituto Nacional de Farmácia e Produtos Médicos (FPM) hasa’e misa agradesementu hodi taka Fulan Maiu nudar Fulan Nain Feto nian, nebe hala’o iha Kapela Santo António Kampo Alor Dili.

FPM hasa’e agradesementu ba Nain Maromak liu husi tulun Nain Feto. Misa Agradesementu ne’e atu ensera fulan Nain Feto nian, iha nebe durante fulan Maiu nia laran Funsionariu sira husi FPM diáriamente hala’o Reza tersu hamutuk iha tempu lokraik iha Gruta Nossa Senhora de Lourdes iha FPM Dili.

Iha Homília, Padre Selebrante hateten katak Nudar Nain Feto nebe FPM hili sai mahein ba Instituisaun ida ne’e, ita buka atu nafatin banati tuir Ita Nain Feto nia vertude diak sira.

Nudar Nain Feto nebe Pasensia hodi Simu Terus hotu tanba Nia Oan Jesus terus to’o Ema Hedi no Mate iha Kruz. Ita Nain Feto Simu buat hotu ho nonok no Pasiensia, atu salva Klamar sira iha Mundo Raiklaran. Nune’e mos Ita Bo’ot Sira nebe servisu iha Instituisaun FPM ida ne’e, Maske simu kritikas oin-oin husi públiku tanba problemas oin-oin, maibe ita bo’ot sira buka atu nafatin pasiensia hanesan Nain Feto, atu bele hala’o kna’ar loron-loron nian ho diak no responsabilidade atu bele salva ema nia vida.

Entertantu Reza Tersu nebe hala’o iha tempu lokraik nian durante Fulan Maiu no Outubru ne’e, sai ona tradisaun ba Fusnionariu sira desde Tempu SAMES IP nian to’o agora nafatin kontinua tradisaun ida ne’e, atu nune’e nafatin husu tulun ba Nain Feto no Mahein Saun Miguel Arkanju nafatin proteze ba funsionariu sira nebe hala’o kna’ar iha FPM, tanba servisu ba Lojistika, iha Parte Armazen no Servisu Distribuisaun produtos Mediku nian ne’e nudar servisu nebe todan, la kuñese loron feriadu, maske kalan ka loron sempre prontu atende ba nesesidade sira iha fasilidade Saúde iha teritoriu Timor Laran tomak.

Responsavel Koru ba Misa Agradesementu refere mak Koru Saun Rafael FPM hamutuk ho Estudante Estájiadu Sira husi ICS Dili.

Partisipa iha Misa Agradesementu ida ne’e mak Jerente sira husi Instituto Nacional de Farmácia e Produtos Médicos (FPM), funsionariu sira FPM nian, Estudante Estájiadu sira husi Instituto Ciencia de Saúde (ICS DILI), Servisu Limpeza sira, inklui familia sira hotu.