𝐊𝐢𝐧𝐭𝐚-𝐅𝐞𝐢𝐫𝐚, 12 𝓙𝓾ñ𝓾 2025; Instituto Nacional de Farmácia e Produtos Médicos (FPM) Simu Vizita husi Ilhas Nain Santo António iha FPM Rua Kampo Alor, Dili.

Vizita ida ne’e nudar parte ida atu selebra loron Padroeiru Santo António iha Sentru Pastoral Kampo Alor Dili. Tanba Geografikamente FPM partense mos ba iha Sentru Pastoral Kampo Alor nian, tanba ne’e iha tinan hirak ba kotuk liu husi konselhu pastoral Kampo Alor deside atu konsidera Instituto Nacional de Farmácia e Produtos Médicos (FPM)/SAMES (Naran altura neba) hodi sai mos nudar Bairo foun ida nebe partense mos ba iha Sentru pastoral Kampo Alor nian. Ho nune’e, hahu husi tempu nebá Sempre iha vizita husi Ilhas Nain Santo António nian mai iha FPM to’o agora sai ona tradisaun ida.

Vizita Ilhas Santo António nian iha FPM ne’e, simu ho Dolin husi Funsionariu FPM nian no dansa Kultura nebe organiza husi estudante Estajiadu ICS nian nebe hala’o hela sira nia estajiu iha FPM.

Diretora Ezekutiva FPM Sra. Paulina Mendonça Maher, S.E. lidera hodi reprezenta funsionariu sira hotu hodi tara tais ba Ilhas Santo António nian wainhira simu Ilhas Santo António nain iha Portaun Bo’ot FPM nian. Diretora Ezekutiva FPM iha nia Lian Bemvindu nian, hato’o agradese wain ba Konselhu Pastoral no mos Komunidade/Sarani Kampo Alor tomak nebé mak nafatin konsidera hodi nune’e Ilhas Nain Santo António mai Vizita iha Fatin ida ne’e.

Vizita ne’e durante minutu 20 resin hodi Ilhas Santo António nian hela hamutuk ho Sarani no Funsionariu sira FPM nian iha Resintu FPM nian. Dirijentes sira no Funsionariu sira hotu hamutuk ho sira seluk nebe hakna’ar-an iha fatin FPM hato’o Agradese ho laran ksolok hodi simu Ilhas Santo António nian, Nakonu iha Antusiasmu hodi hasa’e Orasaun hamutuk ba Nain Santo António.

Hafoin vizita iha FPM, Ilhas Santo António ba fali vizita tan iha bairo seluk no remata iha Kapela Santo António Kampo Alor. Sarani sira husi Sentru Pastoral hamutuk ho Funsionariu sira, hala’o prosisaun hodi akompanha Ilhas Santo António nian to’o fali iha Kapela.