𝐊𝐢𝐧𝐭𝐚-𝐅𝐞𝐢𝐫𝐚, 10 𝐉𝐮𝐥𝐥𝐮 2025 – Instituto Nacional de Farmácia e Produtos Médicos (FPM) no Ajensia TIC TIMOR IP. marka momentu importante iha loron Kinta-feira, 10 Jullu 2025, nune’e hasai ona kooperasaun formais liu husi assinatura Memorandu de Entendimentu (MoU), Akordu Nivel Servisu (SLA) no lansamentu Portal Ofisiál (Website) FPM nian. Serimónia ofisiál ne'e realiza iha Salaun FPM LASAMA, Rua Kampo Alor, Díli,

Iha serimónia ida ne’e, FPM no TIC TIMOR IP formaliza kooperasaun entre instituisaun rua ne’e liu husi assina MoU, ne’ebé Assina husi Diretora Ezekutiva FPM Sra. Paulina Mendonça Maher, S.E., no Diretor Ezekutivu TIC TIMOR IP. Sr. Venâncio Pinto, S.Kom. Akordu ida ne’e hatudu komitmentu nebe forte hodi bele hasa’e dezempenhu institusional atu fó suporta servisu FPM no hodi bele responde ba nesesidae sira, no liu-liu melhora atendementu ba fasilidade saúde sira.

Iha biban hanesan, Instituisaun rua refere assina mos akordu tekniku SLA (Service Level Agreement) 2 (rua), ida kona-ba servisu infrastruktura teknolójia no ida kona-ba sistema no aplikasaun.

• SLA ba Infrastrutura assina husi Diretor Administrasaun FPM Sr. Manuel Rodrigues Soares no Diretor Rede Infeastrutura TIC TIMOR IP, Sr. Henrique Fulgencio Guterres, hodi formaliza kompomisu ba prestasaun servisu rede no infrastruktura.
• SLA ba Sistema no Aplikasaun assina husi Diretor Administrasaun FPM Sr. Manuel Rodrigues Soares no Diretor Sistema no Aplikasaun TIC TIMOR IP, Sr. Justo Fernandes ho objetivu apoiu no suporta tekniku ba iha prestasaun servisu iha area Sistema no aplikasaun.

Alem de Assinatura Akordu, Parte ne’ebé importante liu iha serimónia ne’e mak lansamentu Portal Ofisiál (Website) FPM nian, ne’ebé lansa direitamente husi Diretor Ezekutivu TIC TIMOR IP no Diretora Ezekutiva FPM, akompanhadu husi Diretores sira hotu.

Portal ida ne’e sei sai meiu komunikasaun digital entre FPM no públiku, inklui kontéudu kona-ba atividadi institusional, relatóriu, dadus jestaun no programasaun servisu seluk tan. Ida ne’e passu ida importante tebes atu bele halo servisu FPM diak liu tan ho efisiénsia, aksesívu no transparansia.

Diretor Ezekutivu TIC TIMOR IP. Hato’o nia nia intervensaun katak ho Assina MoU no SLA ida ne’e bele hametin liu tan Kooperasaun Servisu nian iha aspektu oin-oin iha futuru, liu-liu ba iha Dizitalizasaun Servisu no Teknolojia nian. Entertantu Diretora Ezekutiva FPM hato’o nia Agradesementu wain ba TIC TIMOR IP tanba apoiu ona mai iha FPM, no husu atu nafatin fo suporta tekniku mai FPM, inklui kapasitasaun ba Reakursu Humanu iha area Teknolojia nian.

Serimónia ne’e hetan partisipasaun husi struktura ka dirijentes sira, tekniku, ofisiais no funsionáriu sira husi FPM no TIC TIMOR.

 Ho serimonia ida ne’e reflete seriedade no kompromisu institusional atu kontinua reforma no modernizasaun ba jestaun públiku liu husi teknologia.

Atividade ida ne’e passu importante ba FPM no TIC TIMOR IP iha kontinuidade kolaborasaun estratéjika, espesiálmente iha domíniu digitalizasaun servisu públiku iha Instituto Nacional de Farmácia e Produtos Médicos. Liuhusi assinatura MoU, SLA no lansamentu Portal Ofisiál FPM nian ne’e loke dalan atu promove transparénsia no inovasaun.