𝗔𝗞𝗧𝗜𝗩𝗜𝗗𝗔𝗗𝗘 𝗩𝗜𝗦𝗜𝗧𝗔 𝗕𝗔 𝗜𝗦𝗧𝗔𝗟𝗔𝗦𝗔𝗨𝗡 𝗦𝗜𝗦𝗧𝗘𝗠𝗔 𝗦𝗢𝗟𝗔𝗥 𝗜𝗛𝗔 𝗔𝗥𝗠𝗔𝗭𝗘𝗠 𝗙𝗣𝗠
25/07/2025𝗞𝗶𝗻𝘁𝗮-𝗙𝗲𝗶𝗿𝗮, 24 𝗝𝘂𝗹𝗹𝘂 2025, Ekipa UNDP hamutuk ho partisipantes sira seluk hala’o Visita ba iha instalasaun Sistema Solar iha Armazen Sentral Instituto Nacional de Farmácia e Produtos Médicos (FPM) Rua Kampo Alor Dili.
Instalasaun Sistema Solar iha Armazém FPM Dili ne’e sai hanesan Sistema solar nebe bo’ot liu primeira vez implementa iha Timor-Leste.
Objetivu atu nune’e bele aumenta efisiénsia no sustentabilidade, liu-liu iha aspektu enerjetiku, ekonomiku no ambiental.
Sustentabilidade iha kontextu ida ne’e, mak hanesan:
- Reduz dependénsia ba eletrisidade husi reder nasionál,
- Mantein kontinuidade operasionál mesmu iha tempu blackout,
- Aumenta utilizasaun fonte enerjia ne’ebé limpa no renovável (energia solar),
- Hamenus kustu operasionál iha tempu naruk,
- No kontribui ba proteksaun ambiente ho hamenus emisaun karbon (CO₂).
Projetu ne'e parte ida husi inisiativa sustentabilidade ne'ebé hetan apoiu husi Povu no Governu Japaun, servisu hamutuk ho parseiru UNDP. Ida ne’e mos sai prioridade ba FPM atu hadia kapasidade servisu no kontinuidade operasaun iha loron-loron, liu-liu kona ba garantia fonte enerjia nebe fornese ba fatin sensitivu iha armazen sira hanesan Cold Room nebe atu asegura aimoruk sira liu-liu vassina inklui produto mediku sira seluk tan. Sistema ida ne’e mos sei utiliza ba iluminasaun, Sistema ventilasaun no mos ba ekipamentus elektroniku sira iha armazem sentral Dili.
Sistema solar ne’e iha panel solar ka modul hamutuk 528 unidade, ho Solar PV Capacity = 311,52 KWp. Sistema solar ne mos inklui ho ekipamentus sira seluk hanesan inverter, bateria no sistema kontrollu Automatiku sira seluk tan.
Espera katak ho ezisténsia ba sistema solar ida ne’e, bele kontribui direta atu aumenta efisiénsia operasionál no fó seguransa kontinuidade servisu iha armazém, ao mesmo tempo promove prinsipiu sustentabilidade liu husi utilizasaun energia limpa no renovável.