Institutu Nacional de Farmacia e Produtos Médicos (FPM) realiza formasaun importante kona-ba "Jestaun Korente Abastesimentu ba Produtu Farmaseutikal inklui Kontraseptivu" durante loron tolu, hahu husi 29 to'o 31 Julho 2024 iha Salaun City 8, Dili.

Formasaun ida ne'e ho objetivu prinsipál atu hasa’e konesimentu no kapasidade pessoal saúde sira hodi hadiak jestaun estoke no sistema inventariu iha sira-nia servisu loron-loron.

Atividade ne'e involve totalmentu 36 pessoal saúde husi Servisu Munisipal Saúde Dili no Rejiaun Administrativu Espesiál Oecusse Ambeno (RAEOA) ne'ebe mai husi Postu Saúde sira iha Munsirejiaunu Dili no Rejiaun Autonomo Oecusse.

 Iha Serimónia Abertura ne’ebe hala’o iha City 8, Reprezentante husi UNFPA Sra. Domingas Sarmento hateten UNFPA hanesan Ajensia ida ne’ebe mak nia servisu atu apoiu ba servisu saude reprodutiva ba nasaun sira nebe mak servisu bá. Tanba nia mandatu hare espesifika ba saude reprodutiva entaun UNFPA apoiu laos deit ba programa no aktividade sira kona ba saude reprodutiva maibe mos ba iha oinsa atu garante ba produto sira no apoiu ba iha servisu saude sexual reprodutiva nian, hanesan kontraseptivu, aimoruk esensial ba saude maternal. Tanba ne’e desde tinan 2019, UNFPA ho apoiu husi Parseiru DFTA liu husi PHD hala’o formasaun ba pessoal saude sira liu-liu ba parteira sira, medika sira no mos ba enfremeiru sira kona ba oinsa atu jere produtos kontraseptivu no mos aimoruk esensial ba iha saude materna nian.

“Laiha Produto mak sei laiha programa”, tanba Sé ita hakarak atu fornese servisu planeamentu familiar maibe sé laiha produto mos hanesan deit, tanba ita koalia deit maibe aimoruk laiha. Tanba ne’e atu jere produtu sira ne’e, UNFPA komitmentu tomak atu apoiu Ministério da Saúde liu husi instituto Nacional de Farmácia e Produtos Médicos (FPM). UNFPA hakarak garante katak aimoruk sira ne’e, to’o duni ba ema sira nebe utiliza. Atu bele atinji ida ne’e mak presiza ita halo jestaun ba ita prosesu armazenamentu no mos nia stoke.

Entertantu Reprezentante Diretora Ezekutiva FPM sr. Boas Alves mos husu ba partisipantes sira atu bele aproveita didiak oportunidade ida ne’e atu bele aumenta partisipantes sira nia kuñesementu kona ba jestaun korente abastesimentu nian hodi nune’e bele aplika fila fali iha ida-idak nia servisu fatin.

Formasaun ida ne'e realizadu ho apoiu tekniku no finanseiru husi Governo Australia liu husi programa kooperasaun dezenvolvimentu, ho apoiu maximu husi UNFPA (Fundu Populasaun Nasoins Unidas). FPM hamutuk ho Ministériu Saúde, liu-liu Programa Familia Planeada, atu garante katak formasaun ne'e alinha ho polítika saúde nasionál no responde ba nesesidade real iha terrenu.

 Jestaun diak ba abastesimentu produtu farmaseutikal no kontraseptivu importante tebes tamba garante katak ema sira iha komunidade bele asesu ba medikamentu no kontraseptivu bainhira presiza, no sistema inventariu ne'ebé efisiente prevene medikamentu sira husi aat ka la uza.

FPM kontinua komprometidu atu hametin kapasidade pessoal saúde sira liu husi formasaun regular no kolabora ho parseiru internasionál no nasionál atu garante asesu ba medikamentu kualidade ba ema hotu-hotu.

FPM nafatin fó prioridade ba kapasita profesonál nian, tanba kapasidade humanu ne'e maka fundamentál atu asegura servisu saude mak fó benefísiu diretu ba komunidade.

Formasaun ida ne'e reprezenta pasu importante ida atu hametin sistema saúde Timor-Leste no garante katak ema hotu-hotu bele asesu ba kuidadu saúde kualidade ne'ebé sira presiza, no liu husi inisiativa sira hanesan ne'e, FPM kontinua servisu hodi realiza nia misaun atu promove asesu universal ba medikamentu no servisu saúde kualidade ba povu Timor-Leste hotu-hotu.

Partisipa mos iha serimónia abertura ba formasaun ida ne’e mak Reprezentante UNFPA, Reprezentante Diretora Ezekutiva FPM, Reprezentante husi Diretor Servisu Saude Munisipiu Dili nian, formadores sira, no mos partisipantes sira husi Munispiu DIli no mos RAEOA.