Instituto Nasionál de Farmácia e Produtos Médicos (FPM) realiza formasaun kona-ba Jestaun Korente Abastesimentu no Managementu Produtu Vaksina iha Munisípiu Bobonaro durante loron 5 - 6 Agostu 2025. Atividade ida ne'e realiza ho kolaborasaun estratéjika entre FPM, Ministériu Saúde liu husi Programa Imunizasaun, INSPTL, ho apoiu finanseiru no tékniku husi UNICEF no WHO.

Formasaun ne'ebé envolve 16 partisipante husi FPM Rejionál Maliana, SSM Liquiça, SSM Ermera, SSM Maliana, no SSM RAEOA ne'e foka ba hadi'a kapasidade tékniku iha jestaun korente abastesimentu no managementu produtu vaksina, ho objetivu atu garante kualidade no seguransa vaksina, fortalesese sistema kadeia malirin, no promove efikásia programa imunizasaun nasionál.

Formasaun ida ne'e importante tebes ba garante asesu populasaun nian ba vaksina ho kualidade, hadi'a efikásia programa imunizasaun nasionál, reforsa kapasidade profisionál saúde iha rejiaun, no promove kolaborasaun entre instituisaun saúde nasionál. Rezultadu esperadu inklui kapasidade tékniku ne'ebé hadi'a ba partisipante sira, sistema distribuisaun vaksina ne'ebé efisiente liu, kobertura imunizasaun ne'ebé aumenta iha munisípiu sira, no kualidade servisu saúde ne'ebé hadi'a ba komunidade jerál.

Atividade ida ne'e refleta kompromisu FPM atu kontinua hadi'a kapasidade nasionál iha jestaun produtu farmáseutiku no médiku, espesialmente vaksina, atu garante saúde públika ne'ebé di'ak liu ba povu Timor-Leste.