Instituto Nacional de Farmácia e Produtos Médicos (FPM), realiza aktividade oin-oin hodi selebra aniversáriu ba loron Konsulta Popular ba dala 26.

 

𝐀𝐤𝐭𝐢𝐯𝐢𝐝𝐚𝐝𝐞 𝐃𝐚𝐡𝐮𝐥𝐮𝐤 nebe mak FPM hala’o mak hanesan Funsionariu sira lideradu husi Diretora Ezekuvita FPM Sra. Paulina Mendonça Maher,S.E. halo peregrinasaun hodi Vizita Nain Feto iha Santuario Fatubesi, hodi hasa’ misa Agradesimentu atu fo obrigadu ba Maromak tanba libertasaun ne’ebe povu Timor simu nudar Premiu no Grasa Bo’ot ne’ebe Na’i Maromak Haraik ba Povu Timor-Leste. Biban hanesan, Hala’o mos Asaun Karitativa iha fatubesi, atu fó solidariedade no hanoin malu ho buat ki’ik, hanesan laran no Fuan Timor oan sira nian iha tempu Susar momentu nebá. Aktividade ne hala’o iha loron 15 Agostu 2025, iha Fatubesi Ermera.

 

𝐀𝐤𝐭𝐢𝐯𝐢𝐝𝐚𝐝𝐞 𝐃𝐚𝐫𝐮𝐚𝐤 nudar kontinuasaun mak funsionariu sira hamutuk ho Dirijentes sira lideradu husi Diretora Ezekutiva hala’o Refleksaun ba Loron Istoriku Konsulta Popular nian iha loron 29 Agostu 2025. Aktividade Refleksaun ne’e fó husi Irmã Lurdes (Mana Lu) iha Fatin ISMAIK Dare. Alem ida ne'e, FPM mos halo assaun Karitativa hodi fo apoiu ruma ba Mana Lu ho Estudante sira nebe mak hela iha Asrama ISMAIK.

 

Objektivu husi aktividade hirak ne’e mak atu bele reflekte fila fali loron importante konsulta popular nebe mak husi loron ne’e povu Timor-Leste Hola pozisaun ida nebe firmi ho Prinsipiu hodi deside Ukun Rasik-An ba Rai Timor Lorosa’e. Refleksaun sira hotu hala’o atu hanoin fali istória no luta, no mos aprende tan husi sakrifísiu sira ne’ebé mak Povu Timor hala’o iha prosesu Libertasaun Nasional nian.

 

Loron Konsulta Popular 30 Agostu 1999 hatudu katak povu unidu iha determinasaun no konsege objetivu ida deit: rai laran livre no soberanu. Loron ne’e fó inspirasaun ba ita hotu atu kontinua hadomi no proteje independénsia.

Iha loron importante ne’e, ita hotu presiza rekoñese sakrifísiu bo’ot ne’ebé halo husi povu Timor, no halo kompromisu atu kontinua preserva no valoriza ida-ne’e. Libertasaun la’ós deit istória uluk, maibé responsabilidade ba gerasaun ida-idak atu hadomi, hadia, no fo kontribuisaun ba dezenvolvimentu nasional.