Kuarta-Feira, 07 Janeiru 2026 — Diretora Ezekutiva Instituto Nasional de Farmásia no Produtu Médiku (FPM), Sra. Paulina Mendonça Maher, S.E., partisipa iha Serimónia Termu Entrega Konstrusaun Armazén ba Ekuipamentus Médikus iha Munisípiu Manatuto, ne’ebé finaliza ona husi Kompanhia LINIDA VANSA, LDA.

Serimónia Termu Entrega ne’e hala’o husi Diretór Kompanhia LINIDA VANSA, LDA, Sr. Joel Agapito S. L. Martins, ne’ebé ofisialmente Assina akta no entrega rezultadu konstrusaun Armazén ba Diretora Ezekutiva FPM nian. Tuir mai, Diretora Ezekutiva FPM entrega fali Armazén refere ba Servisu Saúde Munisipal Manatuto, nudar utilizadór prinsipál fasilidade refere.

Armazén ne’e sei utiliza husi Servisu Saúde Munisipal Manatuto atu armazena Produtos Farmaséutiku sira no Ekuipamentus Saúde sira, ho objetivu atu garante seguransa, kualidade, no disponibilidade produtu sira tuir padraun nasional, nune’e bele suporta diak liu servisu saúde ba komunidade iha munisípiu Manatuto.

Konstrusaun Armazén refere hetan apoiu no finansiaméntu husi Fundo Global, ho total orsamentu hamutuk USD 71,057.48 Dollares Amerikanu.

Diretora Ezekutiva FPM iha nia liafuan apresiasaun, hato’o agradese ba Fundo Global tanba bele apoiu ona hodi hari Armazem ida iha Munisípiu Manatuto. Nia mos espera katak ho Armazén ida ne’e, sistema armazenamentu no distribuisaun produtu farmaséutiku no ekuipamentus médiku iha Munisípiu Manatuto sei diak liu tan, efisiénte, no sustentavel, nune’e bele kontribui diretamente ba hasa’e kualidade servisu saúde ba populasaun sira.

Serimónia Termu Entrega refere hala’o iha Edifisiu Armazen Manatuto no hetan partisipasaun husi Diretora Ezekutiva FPM, Kargu Diretor no Xefia husi FPM, Reprezentante husi Fundo Global, Representante husi Servisu Saúde Munisipal Manatuto, Diretor Kompanhia, tekniku sira no seluk tan.