𝗗í𝗹𝗶, [12/01/2026] – Instituto Nasionál de Farmácia e Produtos Médicos (FPM) simu estudante estajiadu sira hamutuk nain 135, ne’ebe sei hala’o sira nia programa estajiu profisionál Klinku I durante fulan 3 iha FPM, hahu husi data 12 Janeiru to’o iha 12 Abríl 2026.

Serimónia Entrega Estudante Estajiadu sira ne’e hahu ho assina akta no entrega ofisialmente estudante sira husi Diretora ESTeS, Fakuldade Medicina Ciencia Saude, Dra. Hendriketa da Silva, MPH. entrega direta ba iha Diretora Ezekutiva FPM, Sra. Paulina Mendonça Maher, S.E.

Atividade ne’e marka kompromisu institusionál entre UNTL no FPM iha esforsu kontinua atu dezenvolve kapasidade no kompeténsia estudante sira nia iha área farmásia no produtu médiku, no liu-liu iha FPM estudante sira sei aprende liu tan kona ba prosesu kompras produtu Medikamentu, Siklu Aprovisionamentu no mos jestaun ba armazenamentu no distribuisaun.

Iha Abertura, Diretora ESTeS FMCS solisita ba Estrutura FPM hotu hamutuk ho CI. sira atu bele akompanha nafatin, sai nafatin mata-dalan ba sira durante hala’o estajiu iha FPM atu nune’e sira aprende liu tan, hodi hasa’e sira nia abilidade no kunesementu iha area Farmacia nian, liu-liu iha ambiente servisu real, tanba sira nudar jerasaun kontinuador ne’ebe aban bairua sei kontribui ba dezenvolvimentu sistema saude iha Timor-Leste. Diretora mos husu atu karik posivel, labele husik mesak ita nia alin estudante sira atu nune’e sira labele la’o mesak no evita komete erru ruma ne’ebe mak ita hotu lakoi atu akontese. Nia mos husu ba estudante estajiadu sira atu disiplina nafatin kumpri regras sira, hatudu atituide diak no respeitu ba ema hotu ne’ebe mak iha fatin ida ne’e.

Iha biban hanesan Diretora Ezekutiva FPM mos hato’o agradese ba parte UNTL tanba hili ona FPM atu bele realiza programa Estajiu kliniku, nune’e bele fo biban ba estudante sira atu hetan esperensia foun iha fatin ida ne’e. Diretora Ezekutiva mos husu ba estudante sira atu bele aproveita didiak tempo hodi aprende barak liu tan, no liu-liu atu hatudu iha pratika ba teoria sira ne’ebe mak aprende ona. Nia mos husu ba Kargu diretores sira atu bele akompanha nafatin estudante sira, nune’e sira bele hetan oportunidade ba aprende no hetan esperensia, kunesemetnu no abilidade iha FPM.

Programa estájiu mak oportunidade importante ba estudante sira atu aplika koñesimentu teóriku iha ambienti servisu real, liu-liu iha, Siklu Aprovisionamentu, Jestaun Armazenamentu, kontrolu kualidade, no seguransa produtu médiku. FPM mos reafirma nia prontidão atu fó orientasaun profisionál no suporta tékniku ba estudante sira hodi garante prosesu aprendizajen ne’ebé di’ak no disiplinadu.

Liu husi Kooperasaun entre instituisaun akademiku UNTL no instituisaun públika hanesan FPM mak fundamental atu prepara graduadu sira ne’ebé kualifikadu, responsavel, no prontu atu kontribui ba dezenvolvimentu setór saúde nian iha rai-laran.

Durante períodu estájiu fulan tolu, estudante estajiadu sira sei envolve diretamente iha atividade sira hanesan observasaun no asisténsia iha prosesuArmazenamentu no Distribuisaun Produtu Farmaceutiku, Prosesu Aprovisionamentu, Prosesu Resepesaun no Ispesaun, no implementasaun prosedimentu padraun seluk tan ne’ebé aplika iha FPM.

Serimónia ida-ne’e hala’o iha Salaun FPM Rua Kampo Alor Dili no partisipa husi Kargu Diretores, Xefia FPM no Estrutru Fakuldade Medicina Ciencia Saude hamutuk ho Korpus Dosentes sira no estudantes estajiadus sira.

Serimónia entrega ne’e remata ho sesaun foto hamutuk no entrega dokumentu ofisiál hodi marka inísiu formál programa estájiu. Husi atividade ida-ne’e, FPM hein katak estudante estajiadu sira bele aumenta nia kapasidade profisionál, ética servisu, no kompreensaun kona-ba knaar estadu nia liu-liu insitutisaun FPM iha área farmásia, hodi prepara sira sai profesionál ne’ebé bele fó kontribuisaun pozitivu ba sistema saúde nasionál iha futuru.