Díli, 06 Fevereiru 2026 — Instituto Nasionál Farmásia no Produtu Médiku (FPM) ho Autoridade Região Administrativa Espesiál Oé-Cusse Ambeno (RAEOA) asina ona Akordu Tékniku ida hodi renova no kontinua kooperasaun institusional iha área kompras medikamentu, aprovisionamentu no fornesimentu produtu médiku. Serimónia asinatura akordu tékniku refere realiza iha loron Kuarta-feira, 06 Fevereiru 2026, iha Salaun Enkontru Prezidenti Autoridade RAEOA. Akordu tékniku ne’e asina hamutuk husi Diretora Ezekutiva FPM, Sra. Paulina Mendonça Maher, S.E., no Prezidenti Autoridade RAEOA, Sr. Régio Servantes Romela da Cruz Salu.

Objetivu husi akordu tékniku refere mak atu hametin kooperasaun institusional entre FPM no Autoridade RAEOA, liu-liu iha área aprovisionamentu, armazenamentu no distribuisaun aimoruk no produtu médiku ba Rejiaun Administrativa Espesiál Oé-Cusse Ambeno.

Akordu tékniku ne’e define klaramente forma servisu kooperasaun entre instituisaun rua ne’e, ne’ebé fó kompeténsia ba FPM atu hala’o prosesu aprovisionamentu aimoruk no produtu médiku ho padraun kualidade ne’ebé tuir regulamentu nasionál vigór iha Timor-Leste. Alén ne’e, FPM mos sei fó apoiu tékniku iha área armazenamentu no distribuisaun aimoruk, hodi garante katak aimoruk no produtu médiku sira to’o ba RAEOA ho seguru, tuir tempu no efikás.

Apoiu tékniku refere inklui mos kapasitasaun ba pessoal relevante sira kona ba jestaun armazenamentu no distribuisaun produtu médiku, hodi hametin kapasidade institusionál no aumenta efisiénsia sistema fornesimentu aimoruk iha rejiaun Oé-Cusse.

Iha konteúdu akordu ne’e, parte rua kompromete atu hametin koordenasaun no komunikasaun institusional, inklui planeamentu nesesidade aimoruk, partilla informasaun téknika, kapasitasaun kontinua no monitorizasaun ba prosesu aprovisionamentu no distribuisaun. Kooperasaun ida ne’e espera bele fó kontribuisaun signifikativu ba melhoria servisu saúde, liu-liu ba komunidade sira iha RAEOA.

Iha nia intervensaun, Diretora Ezekutiva FPM hateten katak asinatura Akordu Tékniku ne’e reflekte kompromisu institusaun atu kontinua fó servisu ho padraun profesionaál no transparente iha prosesu kompras medikamentu no fornesimentu produtu médiku, tuir akordu ne’ebé asina hamutuk ona ho Autoridade RAEOA.

Enkuantu ne’e, husi parte Autoridade RAEOA, Prezidenti Autoridade apresia apoiu ne’ebé fó husi FPM no manifesta espétativa katak kooperasaun ida ne’e bele aumenta efisiénsia sistema distribuisaun aimoruk iha RAEOA, inklui mos dezenvolvimentu kapasidade pessoal liu-husi formasaun no asisténsia téknika.

Ho asinatura Akordu Tékniku ida ne’e, FPM no Autoridade RAEOA reafirma sira-nia kompromisu atu hametin parséria estratéjika, hodi garante kompras medikamentu, asesu aimoruk no produtu médiku ne’ebé di’ak, seguru no sufisiente ba komunidade, no hodi apoiu dezenvolvimentu servisu saúde iha Timor-Leste, espesialmente iha Rejiaun Administrativa Espesiál Oé-Cusse Ambeno.

Hafoin asinatura Akordu Tékniku refere, Diretora Ezekutiva FPM ho nia ekipa hala’o mos sorumutu ho Diretora Regional Saúde RAEOA, Ospitál Rejionál Oé-Cusse no ekipa relevante sira seluk, hodi diskute liu tan kona ba oinsa atu bele azelera prosesu tékniku sira, liu-liu preparasaun espesífika ba kompras medikamentu no distribuisaun produtu médiku husi FPM ba RAEOA. Iha momentu hanesan, ekipa FPM mos halo vizita ba Armazén Produtu Médiku ne’ebé lokaliza iha Oé-Cusse, atu haree kondisaun armazenamentu no sistema jestaun ne’ebé eziste.

Partisipante sira iha serimónia selebra asinatura Akordu Tékniku refere mak hanesan: Diretor Administrasaun, Planeamentu, Finansas no Rekursu Humanu FPM, Sr. Manuel Rodrigues Soares; Diretor Armazenamentu FPM, Sr. Boas Alves Barreto; Xefi Gabinete FPM, Sr. José do Carmo Martins; Xefi Finansas FPM, Sra. Antónia Augusta da Silva, hamutuk ho ekipa sira; no husi parte Autoridade RAEOA, Diretora Regional Saúde, Dra. Merita Marques Lafu, M.Gizi; Diretor Ezekutivu Ospitál Rejionál Oé-Cusse, Sr. Manuel da Cunha; Diretora Apoiu Servisu Klíniku, Sra. Josefina Florentina Oqui; Xefi Departamentu Apoiu Servisu, Sr. Basílio da Costa; Administradora Ospitál, Sra. Odete Amado Martins; Responsável Farmásia DRS. Sra. Maria Liezeti da Cunha, inklui funsionáriu no ekipa sira seluk.