DÍLI, 10/09/2026: Diretora Ezekutiva Institutu Nasionál Farmásia no Produtus Médikus (INFPM), Sra. Paulina Mendonça Maher, S.E., partisipa másimu iha Plenária Sesaun 79 Komité Rejionál Organizasaun Mundial Saúde (OMS-WHO) ba Rejiaun Sudeste Aziátiku.

Eventu ne'e realiza iha Hotel Palm Spring, Kampung Alor, Díli, hahu husi loron 7 to'o 10 Setembru 2026, organiza husi Ministériu Saúde (MS) no OMS-WHO.

Iha diálogu loron ikus, membru sira husi nasaun 11 ne'ebé partisipa iha eventu ne'e hato'o sira-nia apresiasaun ba Governu Timor-Leste. Tanba Timor-Leste sai uma-na'in ba RC79 hodi halibur líder saúde sira husi Rejiaun Sudeste Aziátiku tomak hodi diskute prioridade no asaun ba saúde ne'ebé di'ak iha futuru.

Sesaun 79 Komité Rejionál OMS ba Sudeste Aziátiku ne'e lidera diretamente husi Ministra Saúde, Dra. Élia A. A. dos Reis Amaral, S.H., hamutuk ho Vise-Ministru ba Operasionalizasaun Ospitál, Dr. Flávio Brandão Mendes de Araújo.

Iha eventu loron ikus ne'e, Primeiru-Ministru, Kay Rala Xanana Gusmão, mós marka nia prezensa hodi kumprimenta Xefe Delegasaun sira no lideransa OMS nian husi Estadu Membru sira, hodi hametin kooperasaun di'ak entre Timor-Leste no parseiru dezenvolvimentu sira iha Komité Rejionál Sudeste Aziátiku.