DÍLI, 29/09/2026 - Institutu Nasionál Farmásia no Produtu Médiku (INFPM) marka tan istória ida hodi selebra Loron Mahein INFPM ba dala XV.

Selebrasaun tinan ida-ne'e ho tema "Hamutuk Hadia Servisu ho Responsabilidade"

Komemorasaun ne'e hahú ho Misa Agradesimentu ne'ebé prezide husi Amu Selebrante, Pe. Mariano Quintão, iha Kapela Bairro Pite, ba Mahein INFPM nian: São Miguel Arcanjo, São Rafael Arcanjo no São Gabriel Arcanjo.

Liu husi homilia, Amu Selebrante hateten, INFPM hili São Miguel Arcanjo hodi sai Mahein durante tinan 15 ona. São Miguel hanesan Anju ida ne'ebé defende povu hodi kontra buat aat sira ka tentasaun aat sira.

"São Miguel nia liafuan hateten, la'ós ha'u maka importante, maibé interese maka importante, no la'ós ha'u nia naran maka importante maibé servisu hodi salva ema maka importante. Tanba ne'e, papél INFPM nian importante tebes, nia servisu la'ós haree ba administrativu de'it maibé hanoin ba katak husi ai-moruk bele salva ema barak nia vida," dehan Amu Selebrante.

Amu Selebrante mós husu ba funsionáriu tomak ne'ebé servisu iha INFPM, hahú husi dirijente tun too funsionáriu tomak, atu servi ho laran, servisu ho fuan no honestidade, hodi servi povu no nasaun ida-ne'e, tau matan ba ema ki'ik no kbiit la'ek sira ne'ebé presiza hela tulun, liu-liu moras sira.

"São Miguel Arcanjo konvida ita atu hamriik metin no loloos iha servisu fatin. Tentasaun bele barak maibé ho prezensa São Miguel Arcanjo nian, sei halo ita sai barani hodi hatán ba lia loos," nia hatutan.

Nia esplika katak INFPM hili São Miguel Arcanjo hodi sai nia mahein ho razaun katak, instituisaun Estadu hili nia mahein rasik, hanesan INFPM, tanba funsionáriu sira ne'ebé servisu iha instituisaun ne'e mesak ema fiar-na'in, maioria Katólika, maka SAMES/FPM hili Arcanjo na'in tolu sai hanesan mahein no protetór ba servisu-na'in sira hotu.

Instituisaun Estadu ida-ne'e hahú husi SAMES, EP ho ema na'in 46 iha momentu ne'ebá ho nia funsaun tolu maka hanesan: (1) Prosesu Aprovizionamentu hodi importa ai-moruk; (2) Halo armazenamentu ba ai-moruk sira iha Armazén Sentrál hodi garantia nia kualidade; (3) Halo distribuisaun ba fasilidade saúde sira.

Haree ba servisu prinsipál sira ne'ebé liga liu ba ai-moruk, maka SAMES hili São Miguel Arcanjo hodi proteje husi santanás no hahalok aat sira, São Rafael nu'udar doutór ba medisina no ai-moruk sira iha armazén, no São Gabriel ba informasaun no lia loos sira.

Ho mudansa tinan ba tinan, agora la'o ho Institutu Nasionál Farmásia no Produtu Médiku - INFPM, ne'ebé agora aumenta ona unidade ida hodi haree liu ba produsaun ai-moruk, ne'ebé hahú husi produsaun oksijéniu iha Manatuto, Funsionáriu ne'ebé agora servisu iha INFPM hamutuk ema na'in 224.

Ikus liu, Diretór Ezekutivu Interinu hato'o agradesimentu ba maluk servisu-na'in INFPM sira hotu ne'ebé fó ona apoiu durante ne'e servisu la'o ho di'ak, no prontu hadi'a di'ak liután ba futuru.

Iha momentu ne'e, Amu Selebrante vizita Edifísiu INFPM hodi fó bensaun ba Gruta Santa Lurdes, no bensaun mós ba edifísiu instituisaun INFPM atu nune'e bele fó protesaun ne'ebé di'ak ba funsionáriu tomak ne'ebé hamahan an iha INFPM.