Díli, 05/10/2026: Diretora Ezekutiva Institutu Nasionál Farmásia no Produtus Médikus (INFPM), Sra. Paulina Mendonça Maher, SE, sai hanesan Inspetora ba Serimónia Içar Bandeira Nasionál, fulan Outubru nian.

Liu husi diskursu, Diretora Ezekutiva INFPM, Sra. Paulina Maher, husu ba kargu Diretór no Xefe Departamentu sira atu kontrola didi'ak ida-idak nia staff, koloka nafatin servisu ba sira atu nune`e prosesu hotu bele la'o di'ak.

"Hanesan superiór, husu ba funsionáriu sira atu servisu ho profisionál, servisu ho fuan, servisu ho responsabilidade, tanba papél INFPM nian boot tebes, ema nia vida depende ba ita, liu husi produtu médiku sira ne'ebé ita distribui ba fasilidade saúde sira,"dehan Diretora Ezekutiva INFPM liu husi nia deskursu, iha ambitu Içar Bandeira Nasional Fulan Outubru.

Lideransa feto ne'e mós afirma tan katak, tinan 2026 besik remata ona, sura de'it ona fulan, oinsá atu avalia fali progresu servisu, saida maka halo ona no saida maka seidauk halo, oinsá ba oin.

Tanba ne'e husu nafatin atu ita hotu servisu ho fuan, servisu ho profisionál nomos responsabilidade hodi responde ba ezijénsia no nesesidade povu nian.

Serimónia lçar Bandeira fulan Outubru nian ne'e, responsavel husi Diresaun Distribuisaun no Koru jerál husi São Rafael INFPM. Partisipa husi kargu Diretór sira, Xefe Departamentu no mós funsionáriu tomak INFPM.