Díli, 05/10/2026: Institutu Nasionál Farmásia no Produtus Médikus (INFPM) ofisialmente entrega ona servisu no dokumentu ba Kompañia Supervizaun no Kontratór hodi ezekuta Projetu Konstrusaun Armazén ho andar 3 planu estrutura ba futuru bele to'o Andar 5, ne'ebe kompleta ho Ekipamentu Médiku, Nutrisaun, Armazén Grande, Laboratóriu Kontrolu Kualidade no Sistema Hidrante.

Serimónia entrega servisu ne'e ho asinatura Termu Entrega ka Hand Over entre INFPM ho kompañia manán na'in, termu Entrega ne'e halo Direitamente husi Diretóra Ezekutiva INFPM Sra Paulina Mendonça Maher SE, Akonpania husi Diretur Novus Projetu, Sr Nelson da Costa Coreia, Kargus Diretur no Xefi Departementu sira neebe tutela iha INFPM.

Lansamentu ba konstrusaun armazén andar 3 ne'e realiza tiha ona iha loron 10 fulan Jullu 2026. Tuir lolos obra ne'e la'o ona, maibé tanba prosesu tékniku balun seidauk konklui maka ohin foin halo hand over atu kompañia no konsultór bele hahú servisu.

Konstrusaun ne'e uza Orsamentu Jerál Estadu (OJE) ne'ebé planeia ona husi SAMES iha tinan lima ba kotuk, no foin hahú ezekusaun iha tinan ida-ne'e. Montante orsamentu hamutuk U$ 5,582,706.91. Projetu ne'e manán husi kompañia konstrutór no kompañia supervizaun.

Armazén andar 3 ho estrutura sei prepara ba andar 5 ne'e sei fasilita sistema distribuisaun ne'ebé efisiente liu tan ba hospitál Nasionál, hospitál Munisipál no Sentru Saúde sira iha territóriu tomak

Esperansa INFPM nian maka, kompañia ezekutór bele servisu ho kualidade, tuir dezeñu no tempu ne'ebé determina ona iha kontratu, hodi nune'e armazén ne'e bele finaliza no utiliza hodi responde ba ezijensia povu nian.