Díli, 05/10/2026:Diretora Ezekutiva Institutu Nasionál Farmásia no Produtus Médikus (INFPM), Sra Paulina Mendonça Maher, SE, lidera enkontru rutina ho kargu Diretór no Xefe Departamentu sira, iha Inisiu Fulan Outubru.

Iha enkontru nee ko'alia kona-ba progresu servisu, dezafiu sira no foka mos ba stok ai-moruk ne'ebé disponivel iha armazén INFPM, nomós ai-moruk esensiál sira ne'ebé hatama ona mai, maibé sei iha hela Aeroportu Internasionál Nicolau Lobato no Portu Tibar, nomos Fronteira oinsá aselera lalais ninia prosesu, atu nune'e produtu médiku sira ne'e bele to'o ona iha armazén INFPM, hodi halo inspesaun hafoin halo distribuisaun ba hospitál Nasionál, Munisipál no mós Sentru Saúde sira.

Iha enkontru nee, Diretota INFPM espresa nia konfiansa tomak ba Diretór no Xefe Departamentu sira, no husu atu servisu ho fuan mo responsabilidade, karik iha asuntu balun ne'ebé imi labele atu rezolve, bele mai buka ha'u, atu ita buka solusaun hamutuk, tanba ezijénsia povu nian mais importante.

Iha enkontru ne'e, Diretora Ezekutiva rona mós preokupasaun no progresu servisu husi Diretór Diresaun no Xefe Departamentu sira, kona-ba servisu balun ne'ebé la'o di'ak no balun ne'ebé presiza atu toma atensaun urjentemente.

Enkontru ne'e realiza iha Salaun Enkontru La Sama, SAMES INFPM, Kampung Alor, Díli, Segunda ne'e, no partisipa másimu husi kargu Diretór no Xefe Departamentu sira ne'ebé tutela iha Instituisaun INFPM.