Díli, 07 Outubru 2026- Instituto Nacional da Farmácia e Produtos Médicos (INFPM) simu ofisialmente Mákina no Ekipamentu Histopatolojia hamutuk unidade sia (9) husi Programa Elimination Partnership in Cervical Cancer (EPICC).

Serimónia entrega ne'e hala'o iha Edifísiu INFPM, Campo Alor, Díli, iha kuarta ne'e. Mákina sira ne'e destina atu utiliza iha Unidade Histopatolojia, Hospital Nacional Guido Valadares (HNGV).

Objetivu husi entrega ekipamentu ne'e atu suporta no haforsa servisu laboratóriu Histopatolojia hodi realiza teste, ezaminasaun patolójika no diagnóstiku ba moras kankru, liuliu kankru serviks no tipu kankru sira seluk ne'ebé eziste iha Timor-Leste

Liu husi serimónia entrega ofisiál ne'e, bele hametin liután kooperasaun di'ak entre EPICC ho INFPM, tanba parte rua kompromete atu kontinua kolabora hodi hadi'a sistema diagnóstiku kankru iha Timor-Leste, hodi fó atendimentu ne'ebé lalais no akuradu ba pasiente sira.

Reprezentante Diretora Ezekutiva INFPM, liuhusi Diretór Gabinete Garante Kontrolu Kualidade (GGCQ), Sr. João Cancio hateten, serimónia entrega ne'e importante tebes, tanba liuhusi ekipamentu sira ne'ebé parseiru sira entrega mai bele reforsa kapasidade diagnóstiku kankru serviks iha Timor-Leste.

"Ohin ita mai hamutuk iha fatin ida ne'e, sai hanesan momentu importante ida, apresia tebes ba doasaun husi parseiru dezenvolvimentu Elimination Partnership in Cervical Cancer (EPICC). Objetivu husi entrega ne'e atu suporta no haforsa servisu laboratóriu Histopatolojia hodi halo teste, ezaminasaun patolójika no diagnóstiku ba moras kankru sira,' dehan Reprezentante Diretora Ezekutiva ne'e.

Tuir nia, povu barak maka hasoru hela moras kankru, maibé dala ruma tratamentu labele kontinua ba oin tanba fasilidade la kompletu, maibé ho apoiu ne'e bele ajuda tebes povu ne'ebé presiza.

Ekipamentu ne'e entrega husi EPICC ba INFPM, hafoin ne'e INFPM sei entrega fali ba HNGV hodi utiliza.